तेजबहादुर थाइल्यान्ड ओपन अन्तर्रास्ट्रिय बक्सिङको तेस्रो चरणबाट बाहिरिए


बैंकक, असार १९ । नेपाली बक्सर तेजबहादुर देउवा थाइल्यान्ड ओपन अन्तर्रास्ट्रिय बक्सिङ प्रतियोगिताको तेस्रो चरणबाट बाहिरिएका छन् ।

थाइल्यान्डको राजधानी बैंककमा मंगलबार भएको खेलमा देउवालाई इन्डोनेसियाका मारियो ब्लासिएसले अंकको आधारमा पराजित गरे ।

पहिलो चरणमा ‘बाई’ पाएका देउवाले दोस्रो चरणमा लाओसका खेलाडीलाई पराजित गरेका थिए ।

देउवा बाहिरिएसँगै प्रतियोगितामा सबै नेपाली खेलाडीको चुनौती सकिएको छ ।

थाइल्यान्ड बक्सिङ संघले आयोजना गरेको प्रतियोगितामा ६ नेपाली खेलाडीले प्रतिस्पर्धा गरेका थिए ।

४९ केजीमुनिको तौल समूहमा तेजबहादुर देउवा र ५६ केजीमुनि तौल समूहमा बिमल रोकाले पहिलो चरण पार गर्दा अरु खेलाडी पहिलो चरणबाटै बाहिरिए ।

आसन्न एसियन गेम्सका लागि करिब डेढ महिना थाइल्यान्डमा तयारी गरेर नेपाली बक्सिङ टोली सीधै १८औं एसियन गेम्स खेल्न इन्डोनेसिया जानेछ ।

प्रतिक्रिया दिनुहोस्